[المقطع الأول]
السكوت صاحبي وعيلتي
أنا مش كويس، أنا مش في حالتي
ملغي كإني واخد مؤبد في أوضتي
حاجات إتمنيتها فقدت قيمتها
الناس اللي حبيتها بكسل أكلمها
شكلي القوي ده مجرد شكلي
لكن من جوة لو شوفت هتزعل
عقرب الساعة بحسده على طاقته وعلى سرعته
بتمني إن أقدر أديله روحي بس عشان أموته
حاسس بالذنب على اللي عملته وندمان على اللي ما عملتوش
ما بقيتش أهتم بمشاعر الناس وياريتهم برضه ميهتموش
عقلي إتفق مع جسمي أدوني وجع مالوش تفسير طبي
أوضة العقاب الضلمة في طفولتي بقت الوحيدة اللي بلاقي فيها نفسي
الحقيقة بتنافس الكدب، والكدب بيتصدق أكتر
أنا سحاب مليان ومتعبي لكن مش قادر أمطر
إنت بتحب الوحدة عشان لسه كله حواليك
لكن لو لوحدك فعلاً هتموت عشان تلاقي شريك
كنت ساذج قلبي مكشوف، إتحدف بالملوتوف
اللي عرفتهم في كل الظروف
عرفوني حسب الظروف

[اللازمة]
حاسس باللا شيء بيمد إيده
وبيخلع قلبي من جدوره
كإن شيطاني بيعتريني
بيقنعني إني لايق في دوره
حاسس باللا شيء بيمد إيده
وبيخلع قلبي من جدوره
كإن شيطاني بيعتريني
بيقنعني إني لايق في دوره
[المقطع الثاني]
يمكن بمهد شعوري لبعد الموت فبكون منطوي
في فص في عقلي بيحاول ينتفض لكن لوحده تأثيره مش قوي
بتعب كتير عشان أبان بخير وأكتر عشان أكمل وأعيش
الأيام بتختبرني بكل سخافة وما بتمشيش
باب أوضتي كإنه شريط الحدود بين وطنين وأنا في النزاع بموت
محتاج أكون غبي وسطحي وعبيط عشان أكون سعيد وأضحك بصوت
كنت ملهوف للي بقي مستحيل
قد إيه العالم قاسي وبخيل
فكرت إني هتحرر من الكبت، أتاريني مربوط فيه بصواميل
أي فكرة تخش دماغي بتلاقي زحمة تتوه وسطها
أي لحظه حلوة تعدي على قلبي بيصبعلها
حتى كلامي بيعاندني وبيخسرني حاجات عوزتها
كل رسايلي كاتبها لناس وناس تانية بتقول رأيها
أقولك بجد، الحب مش كافي
خايفة تكرهيني؟ ما تخافي
أعملك إيه، هو طبعي كده
بتونس بنفسي وأتدفى بلحافي
شعارات وحكم، مبادئ وقيم
ما بقوش يغروني ودي مشكلة
لأجَل غير مسمى كل حاجة في حياتي متأجله

[اللازمة]
حاسس باللا شيء بيمد إيده
وبيخلع قلبي من جدوره
كإن شيطاني بيعتريني
بيقنعني إني لايق في دوره
حاسس باللا شيء بيمد إيده
وبيخلع قلبي من جدوره
كإن شيطاني بيعتريني
بيقنعني إني لايق في دوره
[المقطع الثالث]
بقى البراح حاجز
بقى الكلام عاجز
بقى الروتين بارد
زهقت من الحياة، جايز
هتتعودي مرة مع مرة
أرمي طوبتي، ما أكتر الطوب في المجرة
الجو برد رصاص لكن الحزن فيه بالجاف وبكترة
اللي بقربله بيجي عليا فباجي على اللي يقربلي
من العدل حقيقي إني لوحدي
وفي القسوة طريق كله تحدي
راحة البال مدتها مش كافية
يا دوب تبسطني شوية بالعافية
كل اللي باقي من الوجود
عايز جمود وبرود، مش لوحه باكية
بصرخ بأعلى صوت كإن مفيش صوت أعلي من كده
ملايكه أو شياطين، بنده على أي حد موجود هنا
مش فاكر آخر مرة فرحت
سيبت التفكير وإصطبحت
وقفت قدام المرايا تنحت
أنا الطفل اللي فوق ولا النجم اللي تحت
قاعد ملازمني الكسل
السما بتمطر تراب وملل
الناس بيغتصبوا الحياة وأنا سامع صريخها لا يحتمل
الكون بيرتجف وبيبكي
الأرض ماليها الدم بتشكي
الهوا متلوث، كله لاسلكي
الدنيا بقت أضيق من تيشيرتي
[اللازمة]
حاسس باللا شيء بيمد إيده
وبيخلع قلبي من جدوره
كإن شيطاني بيعتريني
بيقنعني إني لايق في دوره
حاسس باللا شيء بيمد إيده
وبيخلع قلبي من جدوره
كإن شيطاني بيعتريني
بيقنعني إني لايق في دوره