انا في العالم التاني بعيش دوري خلص في الاولاني
مبغنيش انا بحكي انا بوصف علي الحاني عنوان لمكاني
انا رحت في عزله ونيسه خلاص مش راجع انا قاعد هنا
هشوفكوا ولو عايزين تشوفوني هتلاقوا صوري في البومي

صحيح انا شوفت كتاب هايشوفه كل مافيكوا ايان كان
صفحات مليانه سعاده وصفحات سوده مليانه احزان
انا شوفت بنفسي نفسي وانا نفسي عايشه وبتوه
شوفت روحي وهيا في جسمي وشوفت الناس اللي ربوة
شوفت انا اول رحله طلعتها في مدرسه من غير اهلي
وانا بمشي واللي بحبها ماشيه بعيد عني بتندهلي
من تاني انا بسمع اخر صوت لجرس فسحة في مدرستي
وانا شايف كل مراحل الخوف وانا باخد باديا نتيجتي

وانا بغلط "وانا بكدب " وانا ببعد . وانا بعند . وانا بوعد . وانا بسعد . وانا بزعل . وانا بفرح . وانا بضحك .وانا عايش بستشهد
وانا خايف . وانا نايم . وانا بضحك. وانا ظالم . وانا صدري .مخنوق زعلان كاتم . في الدنيا بحور وانا عايم في بحور الدايم

خلصت كل شئ . خلص طول الطريق
بعيني بشوف طريق الظلم طريق العدل طريق مسجون وبرئ

حسيت بالخوف وانا قاعد بشوف الدنيا واول غلطه كانتلي
والرعشه اللي اترعشت من اخر ايد في الدنيا شالتني

الدنيا بحالها ليلها نهارها انا مش مختارها
انا شوفت جمالها زعلها لكن عدت ولا يوم هاعرف اكررها
صدقوني انا عيشت الدنيا بحالها " حلوة " ايوة حلوة " لكن خلصت مني وانا كنت جوة لحن الدنيا غنوة

غنوة بتتغني في وتر الحب . وتر الصحبه . وتر السهره . وتر الضحكه . ووتر الفرحه بكل سلالم الدمعه

وطن كبير كان اسمه حياه ياما غنيت علي ليلاه
لكن وسط ده كله ولا داملي غير كلمه في ذكر الله
انا اللي كان عاشق لليل ولنور قمروا اللي يسهّر
يسرح جوة الملكوت ويسيب عقله يسرح ويفكر
حب المعلومه تعبني لكن ريحني كتاب الله
كل حاجة جواه لو روحت لغيروا هترجع لما هتخسر
ــــــــــــــــــــــــــــــــــــــ
عرفت الهوي منذ عرفت هواك
واغلقت قلبي عن من سواك
وبت اناديك يا من تري
خفايا القلوب ولسنا نراك