[المقدمة]
مُجبر يعني

[المقطع الأول]
مش أنا إللي هنفعك ولسه بتصدقي
‎مش بعرف ألعب في الدماغ لإنه مش مركزي
‎بياع مشاعري غاب وهيرجع في ساعة كده
‫‎الـ Item إللي حضرتك طالباه، مش بيتباع عندنا
نقلنا من عِش اليمام لبيت غراب
‎كرهت الماية من كتر ما إتسقيت سراب
‎مش بعاتب، إسمي الصمت أفندي
‫‎طول عمري مِتبرمج، بالـ Code ألاقي الغلطة عندي
نجومي نسيوا النور والضلمة لإن مش نايمين
‎شمسي تعبانة، ومش هتيجي الكام يوم الجايين
الكنز كيس مش فاضل فيه غير وقت
‎مش عارف هطلع إيه، طوّلت في أسانسير الشك
بخاف أعبّر، والحوار بيحيرك
بعد الدَرْبكة، الأدوار إتغيرت
بقيتي إنتي بتطارديني
فـ بتتضايقي، بس بتنسي وتصارحيني
بتكلم صيني وبتردي في اللاسلكي بالأرميني

[اللازمة]
‎كل خطوة بحساب
‎كل حد له باب
‎كل حاجة ليها حل
‎ولكل مايسترو أُستاذ
لسه شايفك قدامي
‎بَعيد اللحظة من تاني
‎كنت لسه هطلع أجري
‎الدنيا شدت لجامي
[بعد اللازمة]
وفي علم النفس كلنا متساويين
عشان في الواقع كلنا متزاولين
الساعة ساحت، وسخت بدلة الشغل
"إبليس بيقول "إمسحها فيا وبطل بخل

[المقطع الثاني]
عروقي تشر هوا، إوعى تقولي لماذا
مع حبايبي حلاق، مقصر في كل حاجة
في المخ غابة، وفي الغابات ضباب
المكالمات إرهاق، بعد إذنك الباب وراك
بتواصل بإهمال زي ما باسوق بالظبط
يا ريت تسيبولي تعليقاتكو في صندوق النقد
الدم الفاير وقت الشدة يقوم بالشيل
الأمل موّت ناموسة قربت للنور بالليل
غيطان بتبور دايمًا
نبات بدون مية
وكتر العطش ممكن يقوي الجذور شوية
بس إنتي برضه زرعة
وثباتك بيخدعك
لازم بحكم الطبيعة تتهرسي تحت درسي
لو أقدر أعمل النجوم إللي في السما چاكيت
هقول إللي أعرفه النهاردة لنفسي من سنة فاتت
الإهتمام لو قل تطلع اللهفة للسقف
برفع يافطة "ممنوع دخول" قدام مدخل الكهف
[اللازمة]
‎كل خطوة بحساب
‎كل حد له باب
‎كل حاجة ليها حل
‎ولكل مايسترو أُستاذ
لسه شايفك قدامي
‎بَعيد اللحظة من تاني
‎كنت لسه هطلع أجري
‎الدنيا شدت لجامي

[بعد اللازمة]
وفي علم النفس كلنا متساويين
عشان في الواقع كلنا متزاولين
الساعة ساحت، وسخت بدلة الشغل
"إبليس بيقول "إمسحها فيا وبطل بخل