"كلمات كمال مسعودي "يا دزاير راه طاب القلب
اضغط هنا لقراءة المزيد من كلمات وقصائد الشعبي الجزائري

[لازمة] (x2)
يا دزاير راه طاب القلب علاش لي عندو تزيدلو
الڨليل يشقى ويتعب راه ما لحق لعشات ليلو

المعيشة راهي تصعب، الڨليل شي ما لحقلو
في كل باب راه يطبطب، لا شقيق لا جار بقالو
غير الّي في نفسو يرغب و الله وصّى في قوالو
المعاونة في كل شي تغلب باذن الله ڨاع نالوا
واحد في صلاتو يطلب مولاه لي ما يبخلو
لاخر بالحيلة يرطّب ربي شي ما يخفالو

[لازمة] (x2)
يا دزاير راه طاب القلب علاش لي عندو تزيدلو
الڨليل يشقى ويتعب راه ما لحق لعشات ليلو

تسيفي على ابنك يتغرب حرمتيه من والديه واهلو
بالدمعة في عينو تلعب مقهور و النار في دخالو
لو كان يصيب وين يهرب هكذا يرتاح من بالو
كل شي عليه راه مزرّب حتى السّحاب غطى هلالو
غير لي يقول نعيا ونكسب و هو متكي على عيالو
لاخر في حياتو يحسب في حسابو راه شايطلو

[لازمة] (x2)
يا دزاير راه طاب القلب علاش لي عندو تزيدلو
الڨليل يشقى ويتعب راه ما لحق لعشات ليلو
واحد من خيالو يرهب من كثر النفاق في فعالو
ولاخر مُخلص في الكذب و الخيانة راس مالو
واحد في نومو يتقلب ولاخر زاهي بغزالو
واحد في خدمتو يتعب لاخر يبذر في مالو
واحد لزواجو يسدّد حتى بيت ما صحتلو
باغي لبُوها يتقرب خايف ما يعطيهالو

[لازمة] (x2)
يا دزاير راه طاب القلب علاش لي عندو تزيدلو
الڨليل يشقى ويتعب راه ما لحق لعشات ليلو

واحد في حياتو يزرب تقول شي والديه دعاولو
ولاخر من سعدو يندب ثلاثين عام ما بان والو
واحد بالشيرة مذبذب لا مال لا عقل بقالو
لاخر يصلي ويشرب تبدل إيمانوا بهبالو
شهر اكتوبر حزن وكرب يا ربي حسّن حالو
فيه الزلازل فيه الحرب غضب الله صعيب حالو

[لازمة] (x2)
يا دزاير راه طاب القلب علاش لي عندو تزيدلو
الڨليل يشقى ويتعب راه ما لحق لعشات ليلو

خوذ كلامي يا صاحب، الظالم ياك ربي نعلو
في نعاشو يعيا يركب ما يوجد غير عمالو
في قبرو تم يتعـذب، ناكر ونكير قبالو
في جهنم يتقلب هو وجميع امثالو
في هاذ الزمان لا تسعجب كل واحد ياخد ما عطالو
كون طايع صون وتأدب، الرب الكريم لا تجهلو
يا كريم يا رحمان يا رب، انت المولى كريم واهلو
ياك مرجوعي ليك واجب كمال مسعودي تستاجبلو
آميـــــــن
[لازمة] (x2)
يا دزاير راه طاب القلب علاش لي عندو تزيدلو
الڨليل يشقى ويتعب راه ما لحق لعشات ليلو