"كلمات كمال مسعودي "ميمتي مشات عليا
اضغط هنا لقراءة المزيد من كلمات وقصائد الشعبي الجزائري

باسمك نبدا يا الله هاذ الأسطار نذكر اسمك بالخشوع توب عليا
يا محمد يا رسول ليك الفرار من بعد اللي مشات العزيزة عليا
لحقها الأجل و طفى شمعة الدار بقيت وحدي وحيد ماكان لي بيا

[لازمة] (x2)
جات الموت اداتلي مومو الأبصار، الحنينة اميمتي مشات عليا

تبعت الغربة وقطعت المزار، داروا عليا اعوام و نسيت الولية
غرتني الغربة مافرحتها باخبار، ماعرفت حتى وين تلحق بيا
نهار تكاكيت و راييت براي كبار، وجه اميمتي جاء ما بين عينيا
من عينيا سالو دمعات غزار، وحش اميمتى ياوخيي هاج عليا
زعزعني باخبار هذاك البشار، اظلام نهاري و تحطم منايا

[لازمة] (x2)
جات الموت اداتلي مومو الأبصار، الحنينة اميمتي مشات عليا

عدات صغرها صابرة على المرار غير باش تهديلي عيش يليق بيا
الصباح نصبّح على وجه النوار، السيسان والياسمين دايرين بيا
ترفد يديها كلما يطلع النهار، من دعوات الخير ندّي بالمية
عند غروب الشمس نصيبها في باب الدار، شطنها غيابي تبكي بشوية
اليوم بلا باب بقيت تستر الدار، طفات الشمعة ذابت على الثريا

[لازمة] (x2)
جات الموت اداتلي مومو الأبصار، الحنينة اميمتي مشات عليا
تمنات تشوفني قبل ماتروح الأعمار، هذا ماتمنات وقت وداع الدنيا
وأنا عليها بعيد زاهي مع الصغار ما خممت نهار في لّي تركت ورايا
ماتت اميمتي وعلى قلبها نار، دَخلت في قبرها محروقة عليا
لعب بيا الزمان ورجعلي غدار، خرجت خرجة فالحياة خرجت فيا
نفدي كل الأموال ما فالأرض والبحر، آش ندير لميمتي تسمح ليا؟

[لازمة] (x2)
جات الموت اداتلي مومو الأبصار، الحنينة اميمتي مشات عليا

صابت اللي وقفوا عليها قربان و جار، قاموا بالجنازة دفنوها بلا بيا
حوسوا عباد الله لمن يعظموا الأجر، وليدها غايب من ذا الجمعية
دخلت للدار طاح عليا ريح الصرصار، فشلي ڨوايمي و بردلي حشايا
بقيت في شوكة نخمم فاللي صار، نبكي وبكايا ماينفع فيا
ميمتي انا فخيرك ماني نكّار، الوقت ما كفاني ندير اللي عليا

[لازمة] (x2)
جات الموت اداتلي مومو الأبصار، الحنينة اميمتي مشات عليا

ميمتي وين هي لّي نوات اديرلي الدار، وتزين لي فرحتي تفرح بيا
ميمتي وين هي لّي تحمل الأزهار وتشوف لّي تولي عروستها حلالية
ميمتي وين هي تعمر الطبق تعمار بشموعو وحنانيه والحنية
ميمتي وين هي لّي تقدم على المختار فال على فال في قولها نية
بالتزغريدات ميمتي تسكت الأطيار، مدارية بالقعدات بالفنطازية

[لازمة] (x2)
جات الموت اداتلي مومو الأبصار، الحنينة اميمتي مشات عليا
من فرقة الميمة يبكي المشرار، واش يقول مسكين مول الصفا و النية؟
حب الميمة يا وخيي راو حب مطيار، فراغها مايتعمر بكنوز الدنيا
كل شيء يتّخلف مادامت الأعمار غير فراق الميمة يا سامع ليا
بالله يا اللايم من يبكي بجهار، لاتلوموا دمعات الفراق قوية
من بكى على ميمتو ماراه داير عار، خلوه براسو دمعتو مجرية

[لازمة] (x2)
جات الموت اداتلي مومو الأبصار، الحنينة اميمتي مشات عليا

خلوني نجرّع الكاتبة من الستّار، سبحانو العالم بكل خفية
ما اصعب فرقتها خلاتني زهّار، ماعرفت نتصرف في أي قضية
خير وجميل الميمة مالو تعبار، منك الطاعة ليها خير هدية
عامل واخدم ميمتك، الحياة مٍرار، ما يفيدك عصيان ولا اعمال السية
الطاعة والصلاة على تاج الأبرار، تلقاه في كتابك مافيه خطية

[لازمة] (x2)
جات الموت اداتلي مومو الأبصار، الحنينة اميمتي مشات عليا

اسمحيلي يا ميمتي قبل المشوار، اسمحي لقبايحي وما فات عليا
اسمحيلي يا ميمتى في هاذ الدار بعد الرحول سماحك مايفيد فيا فيا
اسمحيلي يا ميمتي إذ كنت مغيار، دار الدنيا غرتني ولعبت بيا بيا
اسمحيلي يا ميمتي راني في قفار، في قفار، قولي شكون غيرك اللي يروف عليا عليا
اسمحيلي يا ميمتى بجاه المختار، بشرنا بالخير وفضيلة الولية الولية

ابكي و ادعي يا اليتيم حالك معذار، لّي حرق حشاك حرق حشايا
اتيقن، طيع وصون كل ليلة و نهار، الصبر هذا صارم هموم الدنيا
هاذ القول فصيح ليس هو للتهزار ولّي قلبو حنين يفهم القصية
ولّي داير قوال كلامي للتقصار هذاك جبحو فارغ و عضاه مجفية
وإذا سألت على ناظم الأشعار قول مسعودي غلام رب الكلية
يطلب الرحمة مادامنا زيّار ندخلو قبورنا ياسعدنا هنية
أنا والمومنين بالله كبار وصغار، بشفاعة سيدنا الهادي خير امنية
[لازمة] (x2)
جات الموت اداتلي مومو الأبصار، الحنينة اميمتي مشات عليا