[المقطع]
القوة في الوحدة، لكن هنا بتتحول لضعف
هنا بنستسهل الذل لأجل ما نهون الصعب
فانزود في الطعن، والسكينة من إيد الغريب
عشان أنا وأخويا وإبن عمي بنموت في بعض
وبنجود في الوعظ، وحكم مفيش أكتر منها
بس مقتنعين إن الحكم دي بتطبق نفسها
ومش بنعدل شيء، بنتحجج بطب نعمل إيه
كلها بتتكلم، و كلها بتسأل الفعل فين
فا تعقل إيه؟ هنا الفلوس تعمي القلب وتعمى العين
هنا سعر الروح يكاد يكون أرخص من سعر الكيف
هنا صُناع المجد مشغولين بصناعة البلاهة
عشان أرض وطني خِصبة لزراعة التفاهة
فنان شيء جميل، بس خليك حَرِس في كلامك
حَذِر في كتاباتك، أو جرب تتجه للرسالة
وسلم على اللي قبلك مسيرته إنتهت في الزنزانة
ياما قصايد من دهب هنا إترمت في الزبالة
هنا اللي إختشوا ماتوا واللي غشوا نالوا الجاه
هنا اللي خافوا السلطان أكتر من اللي خافوا الله
ومن غير ليه، هنا لا مجال للتساؤلات
القريب في بلاده تاه
Welcome to the pharaoh land
بقول هنا اللي إختشوا ماتوا واللي غشوا نالوا الجاه
هنا اللي خافوا السلطان أكتر من اللي خافوا الله
ومن غير ليه، هنا لا مجال للتساؤلات
كل من فيها حاله مال
أهلاً بيك في الفارولاند