[المقطع الأول]
كل ما تبقى الأرض أصلب تحت رجلي أترعب
لأنسى كوني شخص بكل معاني الكلمة تعب
وبستغل خوفي في إني أتقدم، مش في إني اتحجم
عارف الفرق بين الراحة وبين ألم مطفي بمسكن
بقالي وجود لما بقالي أهداف أحققها
بسعي للمثالية وعارف إني مش هلحقها
بس هفضل ببقي أحسن كل يوم عن اللي قبله
وده يستاهل إني أتعبله ويطمنّي وانا بقابله
أنا كنت شايفه رماني، لا في زماني ولا في مكاني
وكنت فاكرني هبقى المهدي لو اتولدت في ظرف تاني
تلميذ مذاكرش وفاكر امتحانه اللي ميتحلش
مع إن الكل واخد نفس الامتحان مقلش
من هنا بدأت أحل الأزمة لما بدأت أشوف
إن العيب كان فيا من البداية مكانش في الظروف
آمنت بكون الله بيديني بس اللي استحمله
فبقيت بواجه أي شيء وأنا راضي ومتقبله

[اللازمة]
فجأة بقالي دور، بقالي حياة، بقيت بتبسط
بقالي مكان في دنيا كنت رافضها خوف لأترفض
بقيت بفرح بحاجات كانت تافهة في عيني وصغيره
لما عالجت عيني وشلت من عليها المرض
فجأة بقالي دور، بقالي حياة، بقيت بتبسط
بقالي مكان في دنيا كنت رافضها خوف لأترفض
بقيت بفرح بحاجات كانت تافهة في عيني وصغيره
لما عالجت عيني وشلت من عليها المرض
[المقطع الثاني]
لما تاخد فرصة تانية وإنت قبل الموت بمللي
يبقى صوت من السما بيقولك جه الوقت تآمنلي
فتفوق تشوف كام موته، كام أوفر، كام شوطه
كام حادثة، ليله سودا، كان وارد فيها موتك
واتكتبلك عمر جديد، وإنت كنت أعمى وعنيد
تقوله أموت، يقولك عيش، تقوله ليه مبترحمنيش
وكل دي تجربة، ومكانش فيها صدف
ده إحنا وقعنا عشان نقوم، وعشان نتعلم إزاي نقف
خطائين لكن ده مش هيحدد نوطي ولا نعلى
مش محتاج تغير نفسك، محتاج تغير فعلك
عمر ما جوهر المُزارع زاد أو قلل الحصاد
الفراعنة لما اجتهدوا شوفنا بعيننا الأهرامات
ولو تعبت في صاد ولقيت النتيجة في سين
بعد فترة هتعرف إن السين أحسنلك بكتير
آمن إن ربك أدرى بأفضل حاجة ليك
فبيكافئك في الميعاد وفي المجال المناسبين

[اللازمة]
فجأة بقالي دور، بقالي حياة، بقيت بتبسط
بقالي مكان في دنيا كنت رافضها خوف لأترفض
بقيت بفرح بحاجات كانت تافهة في عيني وصغيره
لما عالجت عيني وشلت من عليها المرض
فجأة بقالي دور، بقالي حياة، بقيت بتبسط
بقالي مكان في دنيا كنت رافضها خوف لأترفض
بقيت بفرح بحاجات كانت تافهة في عيني وصغيره
لما عالجت عيني وشلت من عليها المرض