[المقطع الأول]
كانت بتمص مني كل مللي طاقة وأنا على أمَل
أصحى يوم ألاقيها حست، ألاقي حالها إتعدل
بالتدريج فقدت الأمَل، كل اللي هيتعمل إتعمل
معادش عندي غير إنتي صح عشان معدتش حمل جدل
كان سهل أسيبك بدري لولا قلت سهل أسيبك
لو حالك متعدلش ومتعدلش وخايف أسيبك
لأحسن أتوجع في البُعد وَجع مستحملوش
فبقول وَجع عارفينه أضمن من اللي ما نعرفوش
مش يمكن أسيبك أتعب أضعف أرجع ترفضيني
أو تقبليني وإنتي عارفة إن إنتي إمتلكتيني
فأخسر حتى صرخة جبت آخري وهي يادوب
بتخليكي بعد سنين عِجافٌ تروي عطشي يوم
ياريتني كارِهك إنتي، أنا كارِه نفسي وأنا معاكي
كارِه نفسي عشان حباكي، رافض نفسي عشان قبلاكي
ونفسي ييجي يوم وأكتفي، ييجي يوم وأختفي
نفسي أحط راسي على المخدة راضي عن موقفي

[اللازمة]
كنتي أول نمرة أحفظها، أول صورة في المحفظة
أول خوف هستيري لسبب زي إنك موبايلك فصل
أدمنت حضورك حتى لو هتنامي على السماعة
إكتشفت معاكي إن المكالمة بتفصل بعد ساعة
كنتي أول نمرة أحفظها، أول صورة في المحفظة
أول خوف هستيري لسبب زي إنك موبايلك فصل
أدمنت حضورك حتى لو هتنامي على السماعة
إكتشفت معاكي إن المكالمة بتفصل بعد ساعة
[المقطع الثاني]
معادش فيا مكان لطَعن، معادش لحاجة طعم
مجرد رَفس الغطا والقوم من على السرير بقى صعب
عدت سنة من يوم ما بعدنا ولأجل ما أكون صَريح
سنة تقلها ما يتوصفش مهما أكون فَصيح
تدريجيا كان بيموت إحساسي لما عيني فضيت
عشت معاها بصفتي لوح إزاز وكتر خيرها رضيت
ولسه بحكي عنك للحيطان وللطريق
ولسه العمر بيجري ولسه كل يوم بطيء
وكل ما أئن أفقد الأمل في كون الجرح يلم
فأقول مسيرها تزهق، هي تقول مسيري أحن
أنا في وضع ببذل فيه مجهود يسوء ما يتحسنش
ما أنا بتواجه إني مُزيف، بنفجر مش عاجبك إمشي
أحلامنا كان مبالغ فيها ولا الواقع خاننا
العيب كان في إجاباتنا ولا العيب كان إمتحاننا
عزفنا على أوتار اللوم وعلى أوتار الأسف
نكره كل شيء مش كامل وإحنا مش كاملين للأسف

[اللازمة]
كنتي أول نمرة أحفظها، أول صورة في المحفظة
أول خوف هستيري لسبب زي إنك موبايلك فصل
أدمنت حضورك، حتى لو هتنامي على السماعة
إكتشفت معاكي إن المكالمة بتفصل بعد ساعة
كنتي آخر نمرة أحفظها، آخر صورة في المحفظة
آخر خوف هستيري لسبب زي إنك موبايلك فصل
أدمنت حضورك، حتى لو هتنامي على السماعة
إكتشفت معاكي إن المكالمة بتفصل بعد ساعة