[المقطع الأول]
المنبه رن لكن الهدف من الصحيان سخيف
تكملة النوم مش إختيار، المستقبل مخيف
مافيش جنب بترتاح عليه عشان سريرك حجر
مشيت ورا كل خيط وإنجازاتك رف بكر
حتى القهوة بتستناك تسرح للحظة عشان تفور
الطفل اللي خاف من الضلمة كبر، بقى يخاف من النور
أول ما بتبقى إنفراد وباقي بس تشوط
بتبدأ تسأل نفسك عن حقيقة الوجود
الفرق بين العبقرية والجنون بهتان
أكيد النص الفاضي أنضف من نصي المليان
عشان فشلت في التعايش جيت جهنم الإنتقام
قسوة العلامة إنها بتمنع رحمة النسيان
خلي نصك يسأل نصك عاد علينا إيه من جريه
مادام بنعيش نفس النهاية في آخر السيناريو
وليه بنكون أشخاص مش إحنا طول ما الضوء علينا
أدي تاني منبه رن، لا منا نمنا ولا صحينا

[اللازمة]
مافيش شيء ما تمش وكإن غيابك ما تمش
كل الناس جراحها لمت، جرحك ليه ما لمش؟
بعيد عشان متهمش ولا عشان بعيد متهمش؟
عنيك فضيت فضا جماد ما كرهش وما حبش
مافيش شيء ما تمش وكإن غيابك ما تمش
كل الناس جراحها لمت، جرحك ليه ما لمش؟
بعيد عشان متهمش ولا عشان بعيد متهمش؟
عنيك فضيت فضا جماد ما كرهش وما حبش
[المقطع الثاني]
ولد صغير، حلم كبير، ولما كبر الحلم مات
عجيب ضعف البشر وعجيبة قوة الكلمات
كلنا أسباب، ده صاب عشان ده خاب
بس طول ما البشر سلالم إعرف إن اللي فوق كلاب
ما لحقناش نشوف النور، وصلنا والشعاع مكسور
سيبنا الأرض لأجل بذور، رجعنا لقينا الأرض بور
والأوضاع ما إتحسنتش لكن ما بقيتش صاحب قضية
مضيت على إن مستقبلي مش أحسن من ماضيا
أسيب الجامع أقلع القفطان ألبس قبطان
أسوق سفينة تغرق أرقص رقصة القرصان
بطريقة غير مباشرة الدنيا قالتلي أقف بعيد
لما كل شيء قربت منه مات ببطىء شديد
هعمل إيه في قفص بجناح؟ سؤال إيه اللي أنا جوابه؟
تملي في إيدي في مفتاح ما أعرفش بابه
ما أقدرش أختار ما بينكوا وأخسر نعمة المحايد
حب واحدة ما يتنسيش بواحدة، يتنسى بوحايد

[اللازمة]
مافيش شيء ما تمش وكإن غيابك ما تمش
كل الناس جراحها لمت، جرحك ليه ما لمش؟
بعيد عشان متهمش ولا عشان بعيد متهمش؟
عنيك فضيت فضا جماد ما كرهش وما حبش
مافيش شيء ما تمش وكإن غيابك ما تمش
كل الناس جراحها لمت، جرحك ليه ما لمش؟
بعيد عشان متهمش ولا عشان بعيد متهمش؟
عنيك فضيت فضا جماد ما كرهش وما حبش
[المقطع الثالث]
نفس المطعم والأوردر، متخاطرش دقيقة
طعم الملل أحلى من خسارة جديدة
رص مزيد من لا شيء، مزيج من الحمول عليك
بص عمرك من قدامنا عدى، نسيك ده ولا إيه؟
بتعمل مش مهتم ولا مش مهتم فعلاً؟
ضد أو مع الغريزة لما الموجة تعلى
الأقوى دايمًا صح والأضعف ما قالش إشمعنى
ماهو لو كل واحد طلب حقه الدنيا مش هتسيعنا
قريتنا وش فقر وناسها وش خوف وجهل
البنا ما بينهم صعب بس الهد بيهم سهل
ما تقولش زي العامة إن الفشل محتاج شماعة
نار القلق تحرق كيلو نيكوتين في ساعة
كل عيون كلاب حارتنا ما فارقتكش لحظة
ما خالش عليهم إنسحابك قبل كل رقصة
عيب المبدأ إنه فضحي والذكاء له ريحة
مهما دبحت نفسك مش هتبان دبيحة

[اللازمة]
مافيش شيء ما تمش وكإن غيابك ما تمش
كل الناس جراحها لمت، جرحك ليه ما لمش؟
بعيد عشان متهمش ولا عشان بعيد متهمش؟
عنيك فضيت فضا جماد ما كرهش وما حبش
مافيش شيء ما تمش وكإن غيابك ما تمش
كل الناس جراحها لمت، جرحك ليه ما لمش؟
بعيد عشان متهمش ولا عشان بعيد متهمش؟
عنيك فضيت فضا جماد ما كرهش وما حبش