[المقطع الأول]
ضهرك لحق مش من مصلحتك تنصفه
سبب جمال الغنوة قبح اللي بتوصفه
ساعات اللي إنت شايفه يبقى اللي إنت شايفه
أغلب الأوقات شجاعتك جات من الخوف اللي إنت خايفه
من دوشة تل الغلطات مش سامع من السما أصوات
بالغل وبالخوف متحاط  مش عارف تاخد خطوات
كله غرز بوزه في التراب في أول نطة
هما حاولوا تاني وإنت اختارت حاجز أوطى
قتلوا منا كتير بحجة شيء أهم
خلوا الهوا اللي بيني وبينك ريحته دم
ماداقوش إزاي الوجع شيء ملموس وطعمه في بقك
ظنوك بتقول مجازا إن الظلم كسر شوكتك
مش أرق اللي مسهرك للميعاد ده
كل اللي عدى مستنيك على المخدة
واللي فاكره حب قالوا عنه غدة
معظم النجوم اللي بتحكيلها مات من مدة

[اللازمة]
قتلت جزء فيك عشان يعيش أغلبك
معظم الحقيقة على ورقة في سلة مكتبك
لو رموا الشبك والتيار بدأ يسحبك
وإنت عومت عكس الإتجاه للحظة ده مكسبك
قتلت جزء فيك عشان يعيش أغلبك
معظم الحقيقة على ورقة في سلة مكتبك
لو رموا الشبك والتيار بدأ يسحبك
وإنت عومت عكس الإتجاه للحظة ده مكسبك
[المقطع الثاني]
فرض السكوت يموت شخص بالبطيء
قص كلام من السياق يضل ناس عن الطريق
بعض الوجع داين تدان وبعضه حظك كده
في ناس بتعبد الحياة والباقي كبش فدا
وبصراحة مفيش مؤشرات إن الزمن هيدور
الضلمة اللي في عالمنا قادرة تبلع أي نور
وضع معادش مبلوع، خلافنا في أصل وفروع
ملكنا لا سيف ولا دروع، ملكتوا الطلق والجوع
سعرك سعر ترس في عجلة الإنتاج
وبصراحة يعني من أسباب إيمانك الإحتياج
لبسّوا الرجلين فردة، عبدوا الحس والمادة
نزعوا المعنى من الوردة، ينفوا المطرة لو تندة فوقهم
شوهونا أصبح زوقنا زوقهم
إتعاطفنا لما إتعاطفوا وقولنا قوم لوط بشوقهم
قصاد الريح تفضل جدور وجدور تتقلع
أول مرة أمسك كبريت العلم الأزرق ولع

[اللازمة]
قتلت جزء فيك عشان يعيش أغلبك
معظم الحقيقة على ورقة في سلة مكتبك
لو رموا الشبك والتيار بدأ يسحبك
وإنت عومت عكس الإتجاه للحظة ده مكسبك
قتلت جزء فيك عشان يعيش أغلبك
معظم الحقيقة على ورقة في سلة مكتبك
لو رموا الشبك والتيار بدأ يسحبك
وإنت عومت عكس الإتجاه للحظة ده مكسبك