[المقطع الأول]
البشر غرقوا في شر نفوسهم وإنت مش رسول
طول ما محدش عايز يسمع يبقى إياك تقول
الكلمة ما بتغيرش إلا اللي بيسعى للتغيير
ما تقولش هخسر إيه عشان أعداء الكلمة كثير
لازم تفهم إن الناس بتكيل بمكيالين
والفرد بحد أدنى يمتلك وشين
مش هيبصوا اللي إنت فيه دفعت إيه مقابله
كل يبكي على ليلاه وشيطانه بيطبطبله
اللي أدى إستنى ياخد واللي خذ خلع من بدري
القلم بص على الخشب اللي راح ما بصش إنه مبري
مستكثرين عليك قيراط ما هما رضيوا بي شبر
إش معنى آدم يتسجدله أنا أحسن منه كبر
لو لمحوا الهمة هيحبطوك بكلمة لأجل ما تهمد
عايزين يشوفوك بتموت بشفرة تلمة عايزك تجمد
ولا بيجروا في طريق ولا إنت عقبة لازمها إطاحة
بل سولت لهم أنفسهم إن موتك راحة

[اللازمة]
الغل كال قلوبهم واللي إتبقى منهم غيرة
أسهل تبرير لشر النفس إن الحياة شريرة
العين بتكره كل اللي أحسن منها طول الخط
لو مش أد العيشة بين أحياء أموات إتعض
الغل كال قلوبهم واللي إتبقى منهم غيرة
أسهل تبرير لشر النفس إن الحياة شريرة
العين بتكره كل اللي أحسن منها طول الخط
لو مش قد العيشة بين أحياء أموات إتعض
[المقطع الثاني]
هييجي من أقصى المدينة شخص عكس الباقي
إوعى تشوف بعين القاعدة ما هو إستثنائي
نحن نشك حتى نُدفَع أن نثق
الدنيا مرة مش لازم تشربها سِك
لو، لو رجع الزمن سنة مش هتمشي في طُرق ثانية
أعرف إن مرت سنة من غير ما تكبر ثانية
لو غلطت راجع نفسك وهتدفع لو تمن بصة
واجه إوعى تدفن راسك في التراب وتندب حظك
في ناس بتحس بكبر على تجارب ناس سبقتها
كل اللي كانت دماغه ناشفة الدنيا دغدغتها
في ناس بتعرف تستفيد من كل شخص جرب
وناس لازم إيديها تتحرق عشان تحرم
بين طبقات الناس وتسلق جبل شبه بحت
كل بصة فوق لازم توزنها بي بصة تحت
لو فضلت باصص فاضل أد إيه ومين فوقيك
مش هتحس طلعت أد إيه ولا عمر شئ يرضيك

[اللازمة]
هتضحك على إنك بتقول دلوقتي جبت آخري
دايما اللي جاي أصعب إنشف لسه بدري
عايز جلدك تخين ولو يا تتكسر يا تميل
إتكسر تلحم عضم أنشف ما العضم القديم
هتضحك على إنك بتقول دلوقتي جبت آخري
دايما اللي جاي أصعب إنشف لسه بدري
عايز جلدك تخين ولو يا تتكسر يا تميل
إتكسر تلحم عضم أنشف ما العضم القديم
[المقطع الثالث]
لو بصيت للسما بعين الغِل تلات تربعها
إعرف إنك ماشي في طُرُق بقى لازم ترجعها
إنت عدو نفسك ديننا بيمنعك تتمادى
إلاهنا مش فوق الأولمب بيتنفس عبادة
في أصول الإعتقاد كل الفرق أصابت
الكُفر كبر مش إجتهاد في فهم غامض
لا تنغلق وتشخصن الأمور فتبتذل
نحن أشاعرة في بعض الأمور نُرجئ أو نعتزل
هتحس الإختبار تقيل عليك ومين ما حسش
إبراهيم قال أرني كيف؟ وإبراهيم ما تهزش
فيه قبيح بديله أقبح وقريب بعيده أوضح
وصاحب جنتين إتمنى لو إنه كان الأصلح
هتبان الدنيا ظالمة ما تصدقش اللي إنت حاسه
يوسف لو ما ترماش في البير مكانش هيرمي نفسه
ساعات شرور نفوس الناس تكون خطوة في طريقنا
مش عارفين رايحين لفين فما تقوليش بعدنا

[اللازمة]
الغل كال قلوبهم واللي إتبقى منهم غيرة
أسهل تبرير لشر النفس إن الحياة شريرة
العين بتكره كل اللي أحسن منها طول الخط
لو مش أد العيشة بين أحياء أموات إتعض
هتضحك على إنك بتقول دلوقتي جبت آخري
دايما اللي جاي أصعب إنشف لسه بدري
عايز جلدك تخين ولو يا تتكسر يا تميل
إتكسر تلحم عضم أنشف ما العضم القديم
الغل كال قلوبهم واللي إتبقى منهم غيرة
أسهل تبرير لشر النفس إن الحياة شريرة
العين بتكره كل اللي أحسن منها طول الخط
لو مش أد العيشة بين أحياء أموات إتعض
هتضحك على إنك بتقول دلوقتي جبت آخري
دايما اللي جاي أصعب إنشف لسه بدري
عايز جلدك تخين ولو يا تتكسر يا تميل
إتكسر تلحم عضم أنشف ما العضم القديم