[المقطع الأول]
بصي من ورا الستارة ع الناس اللي ماشية تحت
بيسجدوا لأصنام شبعوا فيها نحت
تعالي أعلمك إزاي أنا بنحت عمري ما أركع
أي حاجة حلوة في عينك إكرهيها فوراً
ها، مش حاسة بتحسن عن من لحظة؟
ع الأقل مافيش جزيرة هتعوميلها أصلاً
طيب، إثبتي على كده، إنتي مكانك هنا
مش هنعمل أي حاجة، بلاش نعملهم على نفسنا
ما تطفيش النور، عن مين هنداري اللي بنعمله؟
مش هنبقى في المستنقع ونجيب عطر نستنشقه
بصي لمنظرنا، هربانين من ضلمة لضلمة
إنتي وأنا عارفين إن جهنم في إنتظارنا
ما بحطش أكليل، فوق مساكن ميتين
يوم حسابنا مش هتداري، هتستخبوا يا كدابين
مريض بأحدث مرض نفسي هيكتشفوه ع الكوكب
مش هتلاقي أحسن مني ولا هتلاقي أسوء

[اللازمة]
مستني إننا هنقرب رغم كنا بنبعد أوي
مستني تقاطع تاني لخط مايل مع مستوي
أقصر طريق ما بيننا أقصر جزء فيه ملتوي
أقوى شيء ربط ما بيننا كان في حياتنا شيء ثانوي

[المقطع الثاني]
إبعد عنها شوية، ما تمسكش فيها بضفرك
اللي إنت بتتنفسه ده ثاني أكسيد كربونها
بطل تدقق فيها وإنت صاحي وقت نومها
مش هتحس إنك سهرت حارس غطاها الليلة بطولها
هي عارفة إنك مريض، هي حابة إنك مريض
هي فاهمة معنى النظرة بس كارهة إنك صريح
قدف إنت وهي لحد وصولها بالسلامة
وإمشي من حياتها لكن سيبلها أنقاض كلامك
تعالي أعلمك إزاي أنا بجري عمري ما أنهج
شايفة أبعد نجمة؟ أقرب حد مني أبعد
وبزيد البعد تزيد القوة، يضيق النفس أحس بذعر
يطول نفسي ومهما جعت أزيح عن طرقي كل طعم
إرمي فوق العرش التاج، غيري برضه مش ملاك
أنا مرض بقول أنا مرض، هو مرض هيقول أنا علاج
بحطم الأصنام اللي إنتي عايشة بتعبديهم
عشان تتوبي، مش تعمليلي واحد وتسجديله
[اللازمة]
مستني إننا هنقرب رغم كنا بنبعد أوي
مستني تقاطع تاني لخط مايل مع مستوي
أقصر طريق ما بيننا أقصر جزء فيه ملتوي
أقوى شيء ربط ما بيننا كان في حياتنا شيء ثانوي