[المقدمة]
لحظة ما إتولدت وشالك بين إيديه
واتأملك بعينه، وقف العالم حواليه
أول صورة بريئة ليك شافها فيك
إيد الضلمة اللي في عالمنا لسه ما إتمدتش ليك
وبدأت تكبر وحبه ليك بيكبر
يوم عن يوم حاجة منه فيك بتظهر
إنت عنده أولى منه لأنه
عازك تكون أحسن من كل الناس ومنه

[المقطع الأول]
وإنتي من صغرك شقاوة الدنيا فيكي
يبص لماما تلفي وشه ليكي
وتيجي لو زهقانة عشان مافيش أطفال في سنك
تقولي ألعب معايا يقلب طفل أكتر منك
أول يوم حضانة مسكتي فيه، سابك بصعوبة
لأنه كان مرعوب أكتر ما كنتي إنتي مرعوبة
لدرجة إنه كان هيرجع ياخدك لولا مامتك
معاكي بيحسبها بقلبه دايمًا مش بالمنطق
وإنت إتأثرت في إعدادية بكام واحد زميلك
فطلبت منه يسيبك، عيب يوصلك ويجيبك
قدر حكم السن وإداك الحرية
راقبك عشان يطمن إنك قد المسئولية
ما كانش غاوي يقولك ذاكر كل شوية
كان عايزك ترتاح كل السنين الجاية
مع ذلك أما زعلت على كلية ما جبتهاش
حضنك وقالك يا إبني العالم ما إنتهاش
[المقطع الثاني]
كبرت وإتغيرت وخدت منه ركن بعيد
بقى بينكوا سور وكل يوم يزيد
لا عدت قادر تسمع منه ولا من باب الود
لا عاد هزاره بيضحك ولا حكاياته تشد
لكن دي مش مشكلته، ده سنه ودي تجربته
عشان يفضل مصاحبك عمل كل اللي في مقدرته
وصلت إنه يركز أما شباب تهزر جنبه
عشان يفتح معاك كلام بشكل تبقى حابه
مع أول عريس حس بقبولك ليه
إتخض لسه فاكر إن اليوم ده لسه بعيد
حس البيت هيفضى، لا الحياة هتفضى
لسه شايفك طفلة، كان عايزاها تفضل
غار فإتحجج وإتشرط وإتلكك
وفك لما إتأكد إنك حبتيه وحبك
عايز مصلحتك، حتى لو مش ده المتشاف
ما حدش خاف عليكي قد ما هو خاف

[المقطع الثالث]
فاضل على يوم جوازك شهر أو أقل
لسه نص جهازك والقرض آخر حل
كمل بيه اللي ناقص، مافيش حاجة إستكترها
قالك نطمن عليكي بس وهندبرها
والدنيا خدتك، بعد الجواز كترت مشاغلك
كل فين وفين بتفضي تزوري أهلك
وهو بدل ما يقولك ليه ما بتسأليش
يقولك لو إحتاجتي حاجة قولي ما تتكسفيش
وإنت الظروف إضطرتك تسافر
ما كانتش ماشية معاك هناك لكن بتعافر
مامتك توفت وهو بطوله صبر
ولما رجعت بعد سنين لاقيته كبر
كبر بجد، بقى بينسى ومحتاج لحد
يفكره بعلاج السكر والشريان اللي إتسد
لاقاك حزين عليه وندمان إنك سبته
ضحك وقالك شُفت أبوك إحلو إزاي في شيبته