[Kouplè 1]
Rakonte listwa Flè Dizè
Se rakonte listwa prensès geto yo, se rakonte
Listwa ti sè n
Ki grandi nan on sistèm ki aprann li ouvè kuis li avan kè l
Kote se a moun san somèy nèg ap mache vann rèv
Flè Dizè bèl ou a di fe
Men se kot grangou touye lanmou, byen bonè l konprann "Je t'aime" pa limen dife
Flè Dizè anfòm k on bas
L ap taye banda, sa l pa bay taye l pran ak vyolans, li pa konn womans
Diyite l pran souflèt, menm jan ak machwè
Flè Dizè ap chache fòs, pot pèn li bay Senjak Majè
Flè Dizè grandi ak matant
On dayiva retrete ki te fè l kwè anndan janm li dwe gen patant
Mizè sal bote l, lonè l sabote
Pou yon anbwate jenn anbwate l
Flè Dizè ap sèvi nan ba
Sou chak grenn byè on dola frè m, kouman pou degi pou l pa bay bout anba l
Flè Dizè mache chache men l al dòmi san soupe
Se ak kalòt, kout pwen, bal mawon p ap dòmi san soupe
Ou ka konnen l, yo rele l Wana
Yo pale de li souvan, se li ou kwaze sou twotwa a chak swa
Flè Dizè te gen rèv pou l medsen ou avoka
Men se lè yo fin koupe l y a wè l te bon tankou on zaboka
Flè Dizè kite lwen dèyè l epòk li te sen an
Tout sa ou tande a, Flè Dizè fèk gen ventan