Ma dah dead fi drink some coaknut water,
See a breadfruit tree,
Lawd, fi walk eena de broilin sun
An bade eena de sea.

Me nyam cabbage an pittata chips
An gwan like seh me please,
But me belly dissa holler
Fi a plate a rice an peas,

Fi a dumplin, a duckoonoo,
Fi a bulla full a spice,
An fi cool me suganwater
Wid a quattie lump a ice.

An fi board a market train an hear
De people-dem a chat
Bout de good foot weh dem buck up
Or de bad dream weh dem got.

English country road-dem pretty
An sometime when me dah roam
An me see a lickle village
Me feel jus like me deh home.

But me galang and me galang,
Me no see no donkey cart!
Me no meet up no black smaddy,
An it heaby up me heart.

For me long fi see a bankra basket
An a hamper load
A number-leven, beefy, blacky
Hairy mango pon de road!

An me mouth-top start fi water,
Me mouth-corner start fi foam;
A dose a hungry buckle-hole me
Am me waan fi go back home.

Go back to me Jamaica,
To me fambly! To me wha?
Lawd-amassi, me figat -
All a me fambly over yah!