[Verse 1]
Oh, lass, gin ye wad think it right
Tae gang wi me this very night
We'll cuddle tae the mornin light
By aw the lave unseen-o
And ye will be my dearie
My ain dearest dearie
It’s ye will be my dearie
Gin ye meet me at ane-o

[Verse 2]
I canna for my mammy gae
She locks the door and keeps the key
And in the mornin charges me
And aye aboot the men-o
For she says thay're aw deceivers
Decеivers, deceivеrs
She says thay're aw deceivers
Ye canna trust ane-o

[Verse 3]
Oh, niver mynd yer mammy’s yell
Nae dout she met yer dad hersel
And shoud she flyte, ye can her tell
She's aft times done the same-o
So lassie, gie's yer haund on't
Yer bonnie milk-white hand on't
Oh, lassie, gie's yer haund on't
And scorn tae lie yer lane-o
[Verse 4]
Oh, lad, my haun' I canna gie
But aiblins I maun steal the key
And I’ll meet ye at yon birkin tree
That growes doun in the glen-o
But dinna lippen, laddie
I canna promise, laddie
Oh, dinna lippen, laddie
In case I canna win-o

[Verse 5]
So he’s gaen tae the birkin tree
In hopes his ain true love tae see
And fa come trippin ower the lea
But juist his bonnie Jean-o
And she's clinkit doun beside him
Beside him, beside him
She’s clinkit doun beside him
Amangst the grass sae green-o

[Verse 6]
"I'm overjoyed wi rapture nou,"
Quo he, and preed his cherry mou
And Jeannie ne'er haed cause tae rue
That nicht upon the green-o
For she has got her Johnny
Her ain lovin Johnny
It's she has got her Johnny
And Johnny’s got his Jean-o