[Verse 1]
Thare war fower and twinty nobles
Fa stood at the king's haw
And bonnie Glenlogie
Wis the flouer o thaim aw
Thare war nine and nine nobles
Rade throu Banchory fair
Aye, bonnie Glenlogie
Wis the flouer o thaim thare

[Verse 2]
Thare war six and six maidens
Fa sat at the king's haw
Bonnie Jean o Bethelnie
Wis the flouer o thaim aw
Doun cam Jeannie Gordon
She cam trippin doun the stair
She's chosen Glenlogie
O thaim aw that wis thare

[Verse 3]
"Glenlogie, Glenlogie
Gin ye'll pruive sae kind
My love is laid upon ye
I've telt ye my mynd,"
He's turnin roon' lightly
As the Gordons daes aw
"I'm sorry, Jeannie Gordon
But I'm promised awa."
[Verse 4]
So he's cawed tae her maidens
For tae mak her a bed
Aye, wi ribbons, syne wi napkins
Tae tie up her heid
And it's up and spake her faither
Well, a wae man wis he
"I'll wad ye tae Dunfermline
He's mair guid than he."

[Verse 5]
"Ye haud yer tongue, faither
For this winna be
Gin I get me Glenlogie
For him will I dee,"
Her faither's ain chaplain
He's a man o great skill
He's wrate a braid letter
Oh, inditin him weel

[Verse 6]
Sayin, "A pox on ye, Logie
Nou since it is so
Thare's a lady's love laid on ye
Must she die in her wae?
And a pox on ye, Logie
Nou since it is time
Thare's a lady's love laid on ye
Must she die in her prime?"
[Verse 7]
Nou, when Logie's got the letter
Him bein amangst men
Och, it's up and spake Glenlogie
"Whit does yon woman mean?"
Ere he looked at the letter
A light lauch gied he
Aye, but e'er he read ower it
Ach, a tear blint his ee

[Verse 8]
"Saddle me the black horse
Saddle me the broun
Bonnie Jeannie o Bethelnie
Will be deid ere I win,"
But the horses wisnae saddled
Nor led on the green
Aye, bonnie Glenlogie
Wis twal miles his lane

[Verse 9]
It was pale and wan wis she
When Glenlogie cam in
But was red and rosy grew she
When she kent it wis him
"Where lies your pain, lady?
Daes it lie in your side?
Where lies your pain, lady?
Daes it lie in your heid?"
[Verse 10]
"Oh no, no, Glenlogie
You're far fae the pairt
For the pain that ye speak of
No, it lies in my hert,"
"Turn roon', Jeannie Gordon
Turn roon' on your side
It's I'll be the bridegroom
Ye'll be the bride."

[Verse 11]
Oh, nou Jeannie's gotten mairied
And her tocher's doun told
Bonnie Jean o Bethelnie
Scarce sixteen years old
Bethelnie, oh, Bethelnie
You shine where you stand
And the heather bells aroon' ye
Shine ower Fyvie's land