[Verse 1]
Is thare for honest poverty
That hings his head and aw that
The coward slave, we pass him by
We dare be puir for aw that
For aw that, and aw that
Our toils obscure and aw that
The rank is but the guinea stamp
The man's the gowd for aw that

[Verse 2]
Whit tho on hamely fare we dine
Wear hodden gray and aw that
Gie fuils thair silks and knaves thair wine
A man's a man for aw that
For aw that, and aw that
Thair tinsel show and aw that
The honest man tho e'er sae poor
Is king o men for aw that

[Verse 3]
Ye see yon birkie cawed a lord
Wha struts and stares and aw that
Tho hundreds worship at his wird
He's but a cuif for aw that
For aw that, and aw that
His ribband, star, and aw that
The man o independent mind
He leuks and laughs at aw that
[Verse 4]
A prince can mak a belted knight
A marquis, duke, and aw that
But an honest man's abuin his might
Guid faith, he maunna faw that
For aw that, and aw that
Thair dignities and aw that
The pith o sense and pride o worth
Are higher rank than aw that

[Verse 5]
Then let us pray that come it may
As come it will for aw that
That sense and worth ower aw the earth
Shall bear the gree for aw that
For aw that, and aw that
It's comin yet for aw that
That man to man the warld ower
Shall brithers be for aw that