["كلمات الراس "عاصفة بفنجان]

[المقطع]
بزاوية القهوة كانت عم تقرا كتاب
عن علاج الاكتئاب بالأعشاب
قبل الملامح الجمال بالسؤال مرسوم ع وجهها
مع كل صفحتين عبسة عدم اقتناع وفجأة بتخلق بسمة
عرفتها أي بسمة؟ تبع اللي بنسى اسمي
رأسها مش تشنج دون أي اصطناع
فيه لمعان بعيونها من طينة الإبداع
تبع الدماغ يلي كلما تغذى جاع
ع شوي سكرت الكتاب ولفلفت الشال، شكلها بردت
سكّرت عيونها، علّت الصوت بسمّاعاتها وشردت
أنا أول ما عم فيق
مع كل شفة قهوة بؤبؤ العين بيضيق
والمشهد بيتكامل لو بتشوف الهوا كيف مع شعراتها عم يتعامل
متل أم حاضنة طفلها عم ترقص
اصابيعها عم تنقر ع الطاولة تماماً ع الوزن، لا بتزيد ولا بتنقص
لدرجة سمعت شو عم تسمع بس بعيوني
وخياراتها بالموسيقا عجبوني
نستني السيگارة وذكرتني فيها لما ببطء شعلتها
وصرت آخد سحبة مع كل مجة عم تفلتها من شفافها
كل زفير يحركه للشال فوق كتافها
إجا سليم قاطعني قال "مريض"، خيي معافى
بس زكاتك زيح الكرسي ع اليمين نتفة
بنوبك ثواب، والثواب بيشفي
صار سليم يثرثر، بس تركيزي ما بيتبعثر
نظراتي مش بذيئة بس الحياة أدب
نظراتي مش بريئة، بريقها تفّه الذهب
طيب هلأ صرت معلق
بغيمة أحاسيس عقلي مغلق
قلبي محدق بحقلة فوانيس
ع ضفاف الكابوتشينو وعشتروت وأدونيس
انشالله الانفجار الجاية ما نصير نزار وبلقيس
سليم رغم الإسهال الحاد اللي صاب لسانه
ما خلى إحساسي حاد عن آلتها ثانية
بس الموت بالمدينة قدر شتت الجوارح
تكاثر قوارض يعني انقراض جوارح
أشباه حواجز بتتضطر عقلي يناور
فحال النشوة داب
ما فاق غير لما شفتها طلبت الحساب
النبض صار يتسارع والأصوات بالراس تتكاتر
آراء عم تتقاتل
بكتفي كمان لحظة ولا هي حجة ت ماطل؟
أنا فعلاً حسيتها ولا كان إعجاب باطل
ت يغذي الألوان براس شاعر؟
بس لأ، قلبي قلي
وتوضيت منيح قبل ما بعيونها صلي
إذا ما سمعتها قلبي كيف ممكن اعشق؟
بلا عشق كيف بعيش؟
إذا عطيت فرصة بعقلي لكل حب بيشرق
ما بصير نسونجي وبنوصف بالطيش
بركي لازم استشيرها آخد رأيها بالإشكال
ما الحكي ببلاش ما بدي تحس باعتداء
والشورى تصير عداء، قالها نديم قطيش
خلص ليكها عم تقوم
بس إذا تركتها تروح رح ضل عم لوم. شكّي
واتساءل إذا كان ممكن لهاللحظة تدوم
لهالرعشة تقول
لهالسحر يضل يصول ويجول
بسراديب روحي يحرق كتبي كالمغول
ويعلمني لغة جديدة، فريدة، خاصة بشخصين
بتنحكى بكل مقاطع الجسمين
معقول هيدي رومنسية من رواسب كان يا ما كان بالطفولة؟
معقول صور مجهولة، عن عشقنا مسؤولة؟
وقف الطريق ووقفت بوجهي
وبحلقت بعيوني حسيت احترق وجهي
قالت: بكرا أنا هون جاية اشرب قهوة الصبح
ففكر يا فتح، وخبرني مين ربحش