["كلمات الراس والدرويش "بيت بيوت]

[المقطع الأول : الدرويش]
صار لازم نمشي
مافي سما بتساع السر اللي بعيوننا
فحدا عم يكتم.. حدا عم يفشي
وحدا ماسك النهار من شعره
عم يسعره
وحدا لاحق خيطان الشمس بده يقلها كلشي
عن آخر طريق البيت.. وعن آخر ريحة شمها
وآخر شقفة دهان شالها من الحيط
ضل كل ما يموت واحد منا ينقص خيط من عباية الليل
لصار عاري عالسكيت..
آخر رفيق..
عم يحلم بالضو.. لا تقله يفيق
كلما اتسعت الرؤيا
صار المدى يضيق
بحر الخوف كبير
والغريق بيجر غريق
آخر هالطريق آخره
وآخر كل عطش بلة ريق
آخر وصية
بكل حنين خيبة
عم ياكل من ذاكرتي
فبخبي صورهم بالجيبة
وبتحرقني خاصرتي
يا وجعي يا آم الهيبة
سرحي الليل على شعرك
وطالعي البيت من الشيبة

[اللازمة]
أنا روح وبيتي جسمي
معنى وبيتي كلمة
وعي وبيتي اسمي
طالعي البيت من الشيبة
أنا سر، بيتي صدر
حر بيتي شعر
صار بيتي الصبر لما عن بيتي طولت الغيبة

[المقطع الثاني : الراس]
أنا شغلي كون علمي أنا
صوتي فوق غيمة
بدك تعرف وين بيتي؟
بيتي نوع خيمة
اللي متلي ما اله بيت
اله رفقة واهل وذكريات
صور أخوات نزلت عالحيط
لتفادي عودة هلوسات
اختلاط الآن مع اللي فات
أنا الفرد الشتات
وين ما بلاقي حالي بكون الظرف الغير مؤات
إذا عم بتبيع نسيان هات
اذا للتلميع عنا لسانات
بس خلينا نروح عالغابة نكتشف حيوانات
اللي متلي خلق بمدينة محتلة
اغترب بمدينة محتلة
رجع عمدينة محتلة، لأ مش لغوية العلّة
المحتل والمحتل شلة وراسي السلة وحقي الغلة
بس ما رح مل قبل ما ملي
مساحتي مني
سكرت دينيي لما آدم أنبأ بآسماء
لما فهموا فرويد بدلوا الوحي بالإيحاء
داء مطرح داء آب مطرح آب
شيخ قبل ما شاب ما شاف غير أمر بالكتاب
اللي متلي ما اله جياب لتساع والوطن بشيكات
مافي خرج حط بالجرح توازن بين ميزانيات
أمن وفساد كل ما تنسرق مدارس وتننهب ثروات
تكتر جيبات تكبر هيبات
كان مستحيل يزوجوا بنتهم حطوا صورته لما مات
فعلاً بكوا كتير بجنازته بس من تحت الكمامات
شادي ما سقط، شادي زمط! البلد سقطت
اللي فوته طلعه كرت بإيده بلّعه دلعه خلص منه ولعه
متل ما سلحه شلحه لبسه قلعه بالكلسون
بيتمنعوا وهم راغبون عالتلفزيون بيتصنعوا ما يثير الجنون
ونحن صامتون، مش باقي وطنياً أنا باقي عفوياً
نحن لغوياً مش نحن دموياً
[اللازمة]
أنا روح وبيتي جسمي
معنى وبيتي كلمة
وعي وبيتي اسمي
طالعي البيت من الشيبة
أنا سر، بيتي صدر
حر بيتي شعر
صار بيتي الصبر لما عن بيتي طولت الغيبة

[الخرجة]
أنا شغلي كون علمي أنا
صوتي فوق غيمة
بدك تعرف وين بيتي؟
بيتي نوع خيمة
أنا شغلي كون علمي أنا
صوتي فوق غيمة
بدك تعرف وين بيتي؟
بيتي نوع خيمة

سطور أصولي كتار
ملجأ منزل ودار
بيتي جمع همومي وضهري رصفته حجار
باكل خبزي وبترك الطريق بلا آثار