Balti - بلطي
مظلوم madlhoum
سيدي الڤاضي ماني راضي باللّي صاير فيّا اليوم
ماكم ڤلتو اللّي البلاد هذي ولاّت دولة قانون
جاني الحاكم هز النصبة اللّي ناكل منها في الخبز
اليوم علاش واڤف ڤدامك حليتولي باب الحبس
لاني سارڤ لاني ڤطعي لا كليت من ارزاڤ الناس
أما علاش اليد اللّي تضرب هي اليد اللّي تتباس
أما خيرلي نسرق نخطف ولاّ نصبة في الكيّاس
جايبها بعرق جبيني ناكل في خبيزة و لباس
يا سيدي الڤاضي ظلموني هزّو رزڤي و سبّوني
ڤلتلهم حسيبكم ربّي ربّي يكون في عوني
سبّولي أمّي والجدّة ظلامت في عينهم الشدّة
لا روف رحمة و لا موّدة قالولي ردّك لا يرّد
كي شديت في النصبة متاعي ركحو فيا بالمتراك
ما حملتش منهم الاهانة و دخلت معاهم في عراك
ڤالو علزيّ تعديّت لا شتمت ولا سبيّت
هاني اليوم واڤف قدّامك و ياما ظلمتو مرابيط

مظلوم يا قاضي مظلوم سيدي القاضي مظلوم مظلوم

سيدي الڤاضي جيتك نحبي على ما ريت و ذڤت عذاب
كان أنا عامل عملة والله نحلف عل كتاب
صحيح اللّي عندي سوابق أما تبت لربي وفيت
زدم عليّ الحاكم للدار في قضيّة مل حيط
هزّوني من فرشي نايم خارج بالضرب ذليل
فمّا ربّي وحدو شاهد الله اللي ما ينام الليل
لڤيت ڤدامي محاضر ماضي مستقبل وحاضر
ڤالولي صحّح قول حاضر بالعربية فوك يور ماذر
يا ڤاضي مل ضرب بكيت علي ما عملتو ڤريّت
الشكوى لغير ربّي مذلّة ذلّوني ولربّي شكيت
راڤد في فرشي وفي بيتي نمشي فيها أنا سنين
صحّة لكم يا ولاد فلان اللّي تشمّو كوكايين
ناكل في الضرب و صابر طلعت قضيّة غبابر
بالجعالة مشيت فيها أنا كبش فداء لولاد أكابر
يا ڤاضي هاني قدامك...أحكم بالقانون
يا ڤاضي ڤلت ضالم رد بالك من دعوة مظلوم
مظلوم يا قاضي مظلوم سيدي القاضي مظلوم مظلوم

سيدي الڤاضي أنا نحكي أنا نغنّي أنا نڤول
يا ڤاضي كانك عاقل احسبني أنا مهبول
لا سرقت و لا ڤتّلت الناس أنا سلاحي هو الفنّ
ڤلي علاش ضلمتو الوردة اللي نتنت في العفن
ڤلتو حرية تعبير كي عبّرنا تنفينا
ڤلتلي فنّك جريمة بحباري نبكّي الأميمة
تحّبو تڤصولي لساني وأنا نحّب نوصل صوتي
فكري وكلامي ما يموتش لو كان ناوين على موتي
يا ڤاضي أحكم بالحقّ أنا نوصّل في الحقيقة
أنا الشاعر و الصحفي أنا الفنّ أنا الموسيقى
جيت طالب وليت مطالب بافكاري شارد وهارب
ڤضية متاعي تعبير يا مرناڤية يا هوارب
الظالم ولّا مظلوم و المظلوم ولاّ ضالم
يا ڤاضي وصّل للعالم في بلادي صارو مظالم
يا ڤاضي هاني قدّامك سلاحي ورقة وقلم
بلادي الدمعة في عينها ما تڤولش مظلوم تحكم

مظلوم يا قاضي مظلوم سيدي القاضي مظلوم مظلوم


Walid maknin kayz