Tu parte…
Tu parte… sì… 'o ssaccio…
Stanotte o dimane…
M' 'o diceno 'e mmane
Ca i' sento 'e tremmà…
M' 'o dice 'sta vocca
Cchiù fredda d' 'o ggelo
M' 'o dice 'stu velo
Ca, triste, 'int' a ll'uocchie te veco 'e passà…
Tutta 'na vita
Tutta 'na vita
Passata aunite, t' 'a può scurdà?
Parla…
Rispunneme:
Vuò bbene a 'n'ato?
E pe' chist'ato me vuò lassà?

Tu parte…
M' 'o dice 'o rilorgio
Ca mò s'è fermato…
M' 'o dice 'stu sciato
Ca i' sento 'e sciatà…
M' 'o dice 'sta voce…
M' 'o dice 'sta faccia…
M' 'o diceno 'e braccia
C'astregneno forte a chi vonno lassà!
Tutta 'na vita
Tutta 'na vita
Passata aunite, t' 'a può scurdà?
Parla…
Rispunneme:
Vuò bbene a 'n'ato?
E pe' chist'ato me vuò lassà?
Tu parte…
M' 'o dice 'sta casa
Ch'è fredda… ch'è scura…
M' 'o diceno 'e mura
C' 'o pponno sapè…
M' 'o diceno 'e vvoce
Vicine e luntane
E tutt' 'e ccampane
Ca sonano a morte stanotte pe' mme!
Tutta 'na vita
Tutta 'na vita
Passata aunite, t' 'a può scurdà?
Parla…
Rispunneme:
Vuò bbene a 'n'ato?
E pe' chist'ato me vuò lassà?