[المقطع الأول]
لما غيمة الشتا بتزحف ع المكان
و صوت دقات المطر يعزف على الاحزان
سيجارتي اهيه ف ايدي مع قهوتي يا سيدي
اقعد هنا قدامي و فهمني واحكيلي حكايتك وروايتك
ما انا من زمان وانا شايفك شاب ويافع و نجم برجك طالع
دايما ف راسك رافع و الاحلام ف عنيك بتلمع
فجأة توهت و انكسرت و العين بقت بتدمع

[المقطع الثاني]
مستغرب انا من سؤالك
ما حالي هو حالك
كمان انتا منين الحكمة دي كلها جايالك
منتا شوفت حياتي و تشكيلي لقراراتي
شوفت راسي مرفوعة مشوفتنيش وانا بطاتي؟
ده كفاحي و احباطي اكل سنين حياتي
كل طريق انا مشيت فيه كنت ببحث عن ذاتي
اكفر عن سيئاتي اعمل ليوم مماتي
و اسيب ذكرى حلوة تكون اعظم رواياتي
بصمة حياتي يفتكروني بيها ولادي
ويحكوا عنها قصص يفتخروا بيها احفادي
كنت شايف ف عين الشمس ان ليا مكان
مش مجرد وش باهت على حيطة النسيان
بس الدنيا بخطة تانية شالت الالوان
شالت كل حاجة و سابت الاسود يبان
مين انتا و جاي منين و فينك من زمان؟
جاي دلوقتي تنصح و تخطب زي الامام
[المقطع الثالث]
يمكن اكون ضميرك
يمكن اكون انا ضلك
يمكن اكون اخر من ف الصراحة يكون فاضللك
روحك هي ثمنك بعرقك او بدمك
الا دي لو ماتت هينطفي حتى ضلك
تنطفي معاه ملامحك
يختفي معاها رسمك
يمكن كمان تختفي الحروف الباقية من اسمك
ليه كل كلامك شكله اني كنت مقصر؟؟
رغم اني كنت معاك و خطايا صدا لخطاك

[المقطع الرابع]
برضو شوفت الحمل بيزيد و عضم كتافي بيتكسر
وكان ف ايديك يا صاحبي و برضو مرضيتش تغير
لا تغير المي ولا سنين حرماني
ولا تغير الزمن اللي ف قراراته اناني
مهما توهت او اتكسرت لسه فيه جوه عزيمة
عشان اقف تاني و اصرخ لمرة وحيدة
و بعلو صوتي انا حقول فيها
انا مهما وقعت ف انا قمت وانتصرت

[المقطع الخامس]
انتا ياللي بتفكر وبتقول كلام كبير
كان عندك وقت اكتر تحاول التغيير
واقف ايديك ف وسطك لا بتتكلم ولا بتعبر
تسمع من غيرك و تشوف و تتعلم اكتر
و تستنى و تشوف الدفة على فين هتسير
بسفينة حلمك التايه ف بحر الاعاصير
سواء الموجه عالية او الميه كما الحصير
في النهاية رست بيك في جزيرة الاساطير
انتا العاقل شايل هم المسائل و الوسائل
حلال مشاكل و حلمك انتا ولا عنه سائل
منتا وقتك مش ملكك ولا الزمن زمانك
بتقوم بأدوار ناس مش قادرة تكون مكانك
[المقطع السادس]
ايوا انا اللي دايما بتهم وبهتم
والم ف هم ما يتلم
دايما سابق السن
دايما على ودني زن
مجروح و بنزف دم
ف الفرح مش م الاوئل انما حاضر ساعة الغم
اوقات حظي معدودة زي ما تكون جمايل
دايما اعصابي مشدودة منا على ضهري شايل
انا ف الحياة دي ماشي و السكة مش بتخلص
لا شاغلني وجع راسي ولا ان النفس بيخلص

[المقطع السابع]
منتا لسه عايش
لسه بتقدر تتنفس
بس فكرك دا يكون سندك لما الناس كلها تفلس
الطريق مهما بيضيق بيجيله يوم و يوسع
وانا اللي عاجبني فيك انك لصوت العقل بتسمع
مش طفل صغير عنيد عن اللي ف دماغه مش بيرجع
شايف العمر بيجري بعيد و اللي فات عمره ما بيرجع

[المقطع الثامن]
مشواري دا سؤال
بدور عن اجابته
لازم حكاية او موال عشان تعرف توصف حالته
مش عارف انا جاوبتك ازاي على كل اللي سألته
اسألتك هزت البركان الي جوايا و فجرته
بس وحياة القعدة دي
اسمع مني المرة دي
متقلقش عليا يا صاحبي و كمل قهوتك عادي