[المقدمة: حودة بودة وإسلام كابونجا]
نزلني الحجز مكلبشني
دخلت ع إللي مخصمني
فوقولي وشغلوا الطوارئ
هو كام شارع بينا فارق
جوة جيهتكم أنا لاجئ
وإللي هشوفه هيتأدب
فيجو الدخلاوي

[إسلام كابونجا]
أنا مش لومانجي، أنا أدارجي
فهد يا ميري، أسد يا ملكي
طارق الجن النكشنجي
إسأل عليا في أي حتة
من طلعت مصطفى البركان
عجماوي بضرب في المليان
كسرنا القفل ع البيبان
مش محتاجين من حد واسطة

[حودة بودة]
نازل نيابة، عندي جلسة
والقاضي هيجددلي حبسة
رجعت الأوضة لقيتها صلصة
الشغلة دايرة في إستعباط
كل واحد شادد ستارة
ما آديكش في الأبطال أمارة
المساجين فاردين عجارة
كده حسبتها غلط
[إسلام كابونجا]
هينط شاب هيكرتلي
زميلي خبطه ومبندلي
والكام برشامة مشغلني
بقيت بفركش المصالب
لعبت جولة مع خصمي
الظابط خد خبر نزالي
على التلاجة وقتي شحني
ع العادي يلا الله غالب

[حودة بودة]
قلتله آباشا إيه يخصك؟
عايز تكمل بيا نقصك؟
قالي الباشا كل أما أطصك
هشحنك على الإنفرادي
نزلني الحجز مكلبشني
دخلت ع إللي مخصمني
رابط إيديا، مغميني
هلعب جولة معاكوا عادي

[إسلام كابونجا]
بطولي بتعامل معاهم
خبط واحد من وسطهم
بيعبولي وبستعدلهم
بلعب جولة بمنديل فاضي
وهما سننلي معالق
ألف حلال على إللي يسابق
ما يعرفوش إني سوابق
خابطكو الأول ومتراضي
[حودة بودة]
ألف حلال عليكو آعم
ما حدش جايب مني دم
هخبطكو وأخبط إللي يضم
والخبط على العين يا تاجر
عند الحجوزة إتحزبت
كلها في بعضها بندت
كل الأوض إتخصمت
والنصلات بقت خناجر

[إسلام كابونجا]
إفتحلي الباب آعم فرج
إمتى ع الأسفلت هنطلق؟
صحيح يا عم الحر ملك
محبوس ما فيش حاجة تساوي
يا باشا لو مسكت شارع
هتعظ وأفكر وأراجع
مش عايز أبقى شاب ضايع
مش عايز أبقى عقباوي

[حودة بودة]
أنا سند، ما بتسندش
ضهري فولاذ ما بيتقطمش
تذكر أسامي ما أعتمدش
أصل الأسامي في الترب
مجضض عصابة شيكاغو
إديت كشاف أخصامي داخو
أي واحد شغل دماغه
خليتها فوق راسه خراب
[إسلام كابونجا]
رسالة لأي حد يوانس
ساعة التنفيذ هديكوا نافذ
الصدفة حلوة وأنا جاهز
مسيرنا نتقابل قريب
فوقولي وشغلوا الطوارئ
هو كام شارع بينا فارق
جوة جيهتكم أنا لاجئ
وإللي هشوفه هيتأدب

[حودة بودة]
أخويا إبن أمي يا واحشني
ليه يا حديد عنه حايشني؟
غيابك والله قافشني
بطلع خنقتي في جسمي
نفسي أشوفك مرة بعينيا
قربت أتحول على الدنيا
أنا يا أخويا لو عليا
هاجي أطمن عليك بنفسي

[إسلام كابونجا]
جناية، بت الإيه تجن
قالتلي حن آواد آجن
بت الجنية نمبر وان
دي في الدلع مالهاش مثيل
أنا بت قلبي مشكلة
كاتبة إسمي ع السلسة
وأنا في عز الكعبلة
كانت جنبي من غير تفكير

[الخاتمة: إسلام كابونجا]
طارق الجن ساحب أوتار
قاطع وش الخصم الغدار
الجن إسمه بيضر نار
جهتنا دي الحي تلاتشار
مساكن طلعت مصطفى
أسامي طايرة مرفرة
عامرية جيهة مشرفة
جهتي التانية أرض الخطر
إسلام بعجر النسر الطاير
إسمه يشرف كل الدواير
أخويا القائد والمغامر
إسلام بعجر ده إسمه علم
أخويا أحمد الجن كامل
فرحته حلوة وقلبه قاعد
ما تجيش معاه وتعملي فاقد
مش هيفيدك يا إبني الندم
حمو الزلط يعني الأسد
حمو الزلط بب البلد
سندال ما بيقولش الغلط
هتخصمه هتموت قتيل
فارس بومبا سيطر في جولة
فارس بيعلم ع العتاولة
دمكو على سلاحه أولى
هتخصمه تخسر كتير
فارس الجعفري بطل
ما تجيش معاه عشان خطر
قطر هيقطع الوتر
لو خبط حد هيصيته
الباشا أحمد رمزي حاضر
قطع الورق والمحاضر
اللولو لو قال يا مشاكل
كل الأخصام يتخرطوا
حمادة بلبل مش بيخسر
كله بيختفي أما يظهر
هتخصمه وقتي تتحسر
كامب شيزار جابت أبطال
فارس السلحدار مقاتل
أخصامه بإشارة تتاكل
بيسحب سنجته ويتعامل
البب فارس السلحدار
شاهر فهمان ومش بيغلط
شاهر فارس مساكن طلعت
أخويا شاهر المتصيت
جدع في الجدعنة متبت
يا أبو العلا إنت بكرة راجع
هانت يا أخويا وتمسك شارع
أبو العلا وهو طالع
هضرب بستة وتلاتين
حودة بودة فنان الغلابة
إسلام كابونجا ده الدبابة
ديشا المصري كتب الكلام
فيجو الدخلاوي ياض ده البابا
وليد لمبادا وحمو كالوشة
إدارات طايرين على السحابة