(المقطع الأول)

خايف من إيديا تتمد عليها تاني
خايف من عينيا ماتتشافش من عينيها تاني
خايف من الأناني لاديله وشي ياكله
خايف من اللي بعده يبقى أوحش من اللي قبله
خايف أموت وأقابله

خايف من اللي عملته فيك وفيه وفيها
خايف ماتصدقش لما اقولك هي دي الحقيقة
وانا كنت خايف أقولها
دلوقتي خايف اشوفها
دفنتي خايف اروحها
خايف من الصحبة

خايف أدي ضهري اخد سكاكين
خايف من بكرة مايجيش
او ييجي ومايمشيش
او يمشي ويسيب ذكريات وحشة مابتتنسيش
خايف اعيش
خايف من الشمس بقفل الشيش

بكذب على مين؟ نفسي
رايح على فين؟ جهنم
خايف أخاف فمبخافش إلا إني أندم
مش سامعني يا أدهم؟
ابقى قابلني هناك
انا مش جاي أصلا بسأل بس "ايه الكلام؟" أصلي بقيت بخاف
(بريدج)

(كلام)
بطئ في الحركة .. قلة نوم وانطواء، رفض
رافض ياكل رافض يتكلم
هيقول ايه يعني لو اتكلم؟
الوضع محسوم بالنسباله سواء كان فشل في كل حاجة بسبب انه فاشل
أو بقى فاشل بسبب إنه فشل في كل حاجة

(المقطع التاني)

خايف أخوِن ف بخون
خايف أتكوِن ف بكون
خايف أرد على سؤال هضطر اموِت ولا أموت
ولا بفوِت ولا بفوت
أنا متثبت أنا مربوط
أنا متأكد إني شاكك أنا الخاضض أنا مخضوض

مش متأكد إني ماسك كويس في الطرابزين
مرض في حد ذاته مش عارف المرض إيه
شاب درامي شاف مسلسل بيصور بكامرتين
سيبك يابني منه مين عارف ده ضرب ايه

ياقدر يازمن ركبي سابت من سواقتك
وانا مش حمل الموت..بخاف من المواجهة
هو انت؟! في المراية وجودي بالنسبالي مفاجئة
زمان كنت ببص ألاقي أدهم
لساني اتكتم
دلوقتي ببص ألاقي كفن
كان باقي الندم بس ،الباقي اتدفن
كنت عايش في ذكرى والعيشة نسِتني ف مت
لسه خايف من ياريتني، وياريتني ما كنت

(الخاتمة)

(كلام)
الرأي ده شئ مش ملموس ولا في إثبات على صحته أو وجوده أصلا
الرأي مالوش وجود إلا لو عندك إيمان بيه
ف أنا مش شايف إن رأيي ليه وجود ، أنا مش مقتنع بيه أصلا
أنا كل يوم بتعلم حاجة جديدة وبكتشف إن الحاجة اللي كنت أعرفها كانت غلط
ف رأيي مش هيتغير--- رأيي مش هيتغير-- بيتغير كل يوم استحالة اقتنع بوجوده
علشان كده أنا ماليش رأي أصلا