[Testo di "Mirrina"]

Ah, ccà! Mirrina reggiti a lu ventu
E fatti lu violu cantu cantu
A nomu di lu Santu Sacramentu
Lu Patri, Figliu, e lu Spiritu Santu
Lu Patri, Figliu, e lu Spiritu Santu

Taglia la spiga 'ncentu voti 'ncentu
E mentri ca tu giri iu cacciu e cantu
Ah ccà! Mirrina, ca 'nta 'stu furmentu
Lu suli d'oru cci jittau lu mantu
Lu suli d'oru cci jittau lu mantu

Ora ca l’aria fu vutata para
Prestu ca po' v'asciuca la sudura
Curremu ca lu suli ca nn'affara
Di quannu agghiorna 'nsinu a quannu scura
Di quannu agghiorna 'nsinu a quannu scura

Amuri tu lu sai, 'sta vita è amara
E sai comu la siti nni turtura
Si scontri a Nina cu la so quartara
Dicci ca Turi so mori d’arsura
Amuri tu lu sai 'sta vita è amara
E sai comu la siti nni turtura
Si scontri a Nina cu la so quartara
Dicci ca Turi so mori d’arsura