[اللازمة]
يا اللي مستغرب قسوتي
خش شوف بعينيك حكايتي
شوف حكايتي من مرايتي
وقولي مين بدأ العداوة

[المقطع الأول]
سابوا قلبي على البلاطة
سابوا روحي على الحديدة
شالوا من جرحي الخياطة
وزودولي جراح جديدة
آه يا قلبي يا اللي شايل
يا اللي وروك الهوايل
دايمًا الطعنة اللي تيجي
من أعز الناس شديدة
خلاص بقيت على نور وقلبي زيكو مات
بكرة السنين هتدور والعبرة بالنهايات
ذهب الدهب بالعقول فرق ما بين الإخوات
يا رب إيه حكمتك؟ وليه أنا بالذات؟
وليه أنا بالذات؟

[اللازمة]
لسه مستغربني تاني؟
حط كده نفسك مكاني
خدت صدمة مزلزلاني
زعلي على قد الغلاوة
[المقطع الثاني]
المواقف بينتلي
مين عليا ومين معايا
كل مشهد مستخبي
شفته من كل الزوايا
آه يا ناس باعت ضميرها
آه يا دنيا إتقل خيرها
الفلوس طلعت حقيقي
للنفوس أوضح مرايا
طلع أخويا وإبن عمي والغريب عليا
حتى اللي من دمي يا ناس يتمنالي الآذية
إختبار فوق إحتمالي، يا رب شديد عليا
محتار والسر الإلهي مش شايفاه عينيا
مش شايفاه عينيا